Aðalfyrirlesarar
Ingibjörg Jónsdóttir
Opnunarerindi
Ingibjörg Jónsdóttir er prófessor í lýðheilsu og forstöðukona við rannsóknarstofnunina Institute for Stress Medicine (ISM) í Gautaborg sem og prófessor við Sahlgrenska akademíu Gautaborgar háskóla.
Ingibjörg útskrifaðist með stúdentspróf frá Menntaskólanum í Reykjavik 1986, lauk námi í líffræði frá Háskóla Íslands 1990, og Doktorsnámi við læknadeild Gautaborgarháskóla 1996. Ingibjörg hefur á undanförnum árum unnið hjá ISM þar sem hún stundar meðal annars rannsóknir á streitu, kulnun og vinnuaðstæðum með fókus á heilbrigðiskerfið og aðra vinnustaði innan þess opinbera. Ingibjörg hefur birt fjölmargar rannsóknir um orsakaþætti streitutengdra sjúkdóma, og þá líffræðilegu þætti sem hafa áhrif á þá sjúkdóma og er einn af okkar fremstu fræðimönnum á því sviði.
Margrieta Langins
Opnunarerindi
Margrieta Langins er yfirhjúkrunarfræðingur og ráðgjafi í málefnum hjúkrunar og ljósmóðurfræða á svæðisskrifstofu Evrópu hjá Alþjóða heilbrigðismálastofnunarinnar (WHO) í Kaupmannahöfn.
Margrieta, sem er fædd í Lettlandi, er með Bsc gráðu frá McGill-háskólanum í Kanada og hjúkrunarfræðipróf frá Háskólanum í Toronto. Auk þess hefur hún lokið meistaraprófi í lýðheilsufræði frá Ecole des Hautes Études en Santé Publique í París. Hún er með víðtæka reynslu í hjúkrun, hefur meðal annars unnið við landsbyggðarhjúkrun, sinnt heimilislausum sem og unnið við barnahjúkrun. Jafnframt er hún með langa reynslu af alþjóðastarfi en hún hefur unnið í yfir 20 löndum víðsvegar um heim. Margrieta hefur unnið hjá WHO frá 2021. Í störfum sínum þar hefur hún meðal annars unnið að málum er varða mannauð hjúkrunarfræðinga og ljósmæðra, að þjónustulíkönum fyrir langtímaumönnun sem og að málefnum tengdum grunnheilbrigðisþjónustu. Hún hefur markvisst unnið að því að valdefla hjúkrunarfræðinga og ljósmæður með því að markmiði að þessar starfstéttir geti starfað af öryggi, við mannsæmandi starfsskilyrði, nýtt menntun sína til fulls og verið lykilaðilar í mótun og forystu heilbrigðiskerfa – sjúklingum og samfélögum til hagsbóta.
Í sínum störfum hjá WHO hefur Margrieta lagt áherslu á að styðja net yfirhjúkrunarfræðinga- og yfirljósmæðra innan stjórnsýslunnar (Government Chief Nursing and midvifery Officers). Nýlega setti hún af stað verkefnið Nursing Action, sem styrkt er af EU4Health áætluninni. Verkefninu er ætlað að bæta starfsskilyrði hjúkrunarfræðinga, örugga mönnun, ráðningar, handleiðslu og koma í veg fyrir brottfall hjúkrunarfræðinga úr faginu í 19 aðildarríkjum Evrópusambandsins.
Frá upphafi COVID-19 faraldursins hefur Margrieta tekið þátt í að veita leiðbeiningar og stuðning til landa með það að markmiði að bæta geðheilsu og sálfélagslegan stuðning fyrir heilbrigðis- og umönnunarstarfsfólk, styrkja langtíma umönnunarþjónustu og viðhalda grunnheilbrigðisþjónustu á meðan faraldurinn stóð yfir.
Árún K. Sigurðardóttir
Heiðurserindi
Dr. Árún K Sigurðardóttir er prófessor í hjúkrunarfræði við Háskólann á Akureyri og er sérfræðingur í hjúkrun fólks með langvinn veikindi með áherslu á sykursýki.
Árún lauk BS prófi í hjúkrunarfræði frá Háskóla Íslands árið 1982, prófi í svæfingarhjúkrun frá Haukeland sjúkrahúsinu í Bergen árið 1987, meistaraprófi í hjúkrunarfræði frá Háskólanum í Cardiff í Wales árið 1997 og doktorsprófi frá Læknadeild HÍ árið 2008. Hún hefur langa reynslu af háskólakennslu, stjórnun innan háskóla og rannsóknum. Árún starfaði á Sjúkrahúsinu á Akureyri um árabil og vann á hinum ýmsu deildum en frá 2007 á sykursýkismóttöku/innkirtladeild sem sérfræðingur í hjúkrun. Hún hefur leiðbeint bæði meistara og doktorsnemum, tekið þátt í mörgum innlendum og erlendum rannsóknahópum og verið gestafræðimaður við ýmsa erlenda háskóla. Rannsóknaáherslur hennar tengjast mest lífi með sykursýki og heilbrigði og vellíðan fólks með langvinn veikindi.
Guðlaug Rakel Guðjónsdóttir
Boðserindi
Guðlaug Rakel er forstjóri Heilbrigðisstofnunar Suðurnesja.
Guðlaug Rakel lauk stúdentsprófi frá Menntaskólanum í Reykjavík 1981 og BSc. í hjúkrunarfræði 1986. Árið 2004 lauk hún MBA námi og hefur jafnframt lokið ýmsum námskeiðum í lýðheilsuvísindum innan læknadeildar HÍ í tengslum við doktorsverkefni sem hún vann að um faraldsfræði notenda bráðamóttaka. Hún hefur meðal annars birt ritrýnda rannsókn um áhrif efnahagshrunsins á komur á bráðamóttökur.
Í gegnum tíðina hefur Guðlaug Rakel verið í fjölda starfshópa um heilbrigðismál og heilbrigðisviðbúnað. Hún hefur langa og víðtæka reynslu af stjórnunarstörfum, auk þess að hafa um árabil starfað sem hjúkrunarfræðingur. Frá árinu 2000 hefur hún sinnt ýmsum stjórnunarstörfum innan heilbrigðiskerfisins. Árið 2019 tók hún við starfi framkvæmdastjóra meðferðarsviðs Landspítala þar til hún var sett tímabundið í embætti forstjóra Landspítala haustið 2021. Árið 2023 var hún skipuð formaður verkefnahóps um mönnunarviðmið í hjúkrun og á þessu ári var hún skipuð formaður vinnuhóps um innleiðingu mönnunarviðmiða í hjúkrun.
Ingibjörg R. Þórðardóttir
Boðserindi
Ingibjörg býr í Grindavík þar sem hún er fædd og uppalin. Hún er hjúkrunarfræðingur og hjúkrunardeildarstjóri á hjúkrunarheimilinu Víðihlíð í Grindavík.
Ingibjörg lauk stúdentsprófi frá Menntaskólanum að Laugarvatni 1989 og BSc námi í Hjúkrunarfræði frá Háskólanum á Akureyri 1995. Einnig hefur hún lokið námi í sjúkraflutningsfræðum og er með EMT-Advanced réttindi. Ingibjörg hóf störf við Heilbrigðisstofnun Suðurnesja (HSS) strax eftir útskrift í hjúkrunarfræði. Þar hefur hún starfað að mestu síðan, fyrir utan þrjú ár sem hún leysti af sem hjúkrunarfræðingur í Hólmavík. Við HSS starfaði Ingibjörg fyrst sem hjúkrunarfræðingur á sjúkradeildinni í Keflavík en flutti sig svo á hjúkrunardeildina í Víðihlíð í Grindavík. Frá 2005 hefur hún starfað sem hjúkrunardeildarstjóri í Víðihlíð og hafði þar bæði yfirumsjón með hjúkrunardeildinni sem og heimahjúkrun í Grindavík sem færðist yfir í Víðihlíð 2011. Frá 2015 hefur Ingibjörg einnig starfað á sjúkrabílnum í Grindavík meðfram starfi sínu í Víðihlíð.
Eftir að hjúkrunarheimilið Víðihlíð var rýmt 10.nóvember 2023 í kjölfar jarðhræringa og eldgos við Grindavík hefur Ingibjörg starfað á hjúkrunardeildinni hjá HSS í Reykjanesbæ en þangað fluttust heimilisfólk Víðihlíðar. Ekki er vitað hvort eða hvenær hjúkrunarheimlið Víðihlíð opnar aftur en það mun tíminn einn leiða í ljós.
Marianne Elisabeth Klinke
Boðserindi
Marianne Elisabeth Klinke er prófessor við Hjúkrunar- og ljósmóðurfræðideild Háskóla Íslands og forstöðumaður fræðasviðs í hjúkrun tauga- og taugaendurhæfingasjúklinga á Landspítala. Marianne, sem hefur unnið við hjúkrun í Danmörku, Grænlandi og á Íslandi, er með yfir 25 ára reynslu í hjúkrun einstaklinga með heilaslag. Undanfarin ár hefur hún verið í leiðandi í rannsóknum á heilaslagi og hefur birt fjölmargar greinar og flutt erindi tengt efninu víðsvegar um heim. Einnig hefur hún verið leiðandi í vitundavakningu á heilaslagi í samfélaginu og í stefnumótun tengdri þjónustu við einstaklinga með heilaslag. Auk fræðilegra og rannsóknatengdra verkefna starfar Marianne einnig sem klínískur sérfræðingur á Landspítala, þar sem hún sinnir ráðgjöf í flóknum taugasjúkdómum og vinnur að gæðabótaverkefnum.
Steinunn Jónatansdóttir
Boðserindi
Steinunn lauk stúdentsprófi frá Framhaldsskólanum í Vestmannaeyjum 1992 og lauk BSc í hjúkrunarfræði frá Háskólanum á Akureyri árið 1997 og síðar meistaragráðu í heilbrigðisvísindum frá sama skóla árið 2015. Steinun lauk viðbótarnámi frá Háskóla Íslands í uppeldis og kennslufræði árið 2009. Undanfarin ár hefur Steinunn stundað doktorsnám við University of Northern British Columbia.
Steinunn starfaði lengst af á sjúkrahúsinu í Vestmannaeyjum, sem síðar varð Heilbrigðisstofnun Suðurlands. Hún starfaði einnig sem framhaldsskólakennari í Vestmannaeyjum og hafði þar m.a. umsjón með námsbraut sjúkraliða. Steinunn starfar í dag sem Aðjúnkt við Háskólann á Akureyri.
Steinunn brennur fyrir landsbyggðarhjúkrun. Rannsóknir og fræðileg skrif hennar hafa því að mestu snúið að málefnum og stöðu hjúkrunar á landsbyggðinni. Meistaraverkefnið hennar fjallaði um áhrif nándar á landsbyggðahjúkrun á Íslandi og hún hefur haldið áfram að skoða félagslega nánd í smærri samfélögum og áhrif nándar á samskipti, hjúkrun og hjúkrunarfæðinga í doktorsritgerð sinni.