Aðalfyrirlesarar

Anna Stefánsdóttir

Heiðursfyrirlesari

Anna Stefánsdóttir útskrifaðist frá Hjúkrunarskóla Íslands árið 1968. Árið 1975 lauk hún framhaldsnámi í gjörgæsluhjúkrun frá háskólasjúkrahúsinu í Edinborg og meistaranámi í hjúkrunarstjórnun frá Edinborgarháskóla árið 1988. Anna var í stjórnunarstöðum á Landspítala mestallan starfsferil sinn, en þar gegndi hún stöðu hjúkrunardeildarstjóra gjörgæsludeildar, framkvæmdastjóra hjúkrunar á handlækningasviði spítalans, hjúkrunarforstjóra og tímabundið stöðu forstjóra Landspítala. Anna var ætíð virk í félagsmálum samhliða störfum sínum á Landspítala. Hún sat í stjórn Hjúkrunarfélags Íslands á áttunda áratug síðustu aldar og var einn af stofnendum og fyrsti formaður deildar gjörgæsluhjúkrunarfræðinga innan þess félags. Hún sat um tíma í stjórn deildar hjúkrunarstjórnenda innan Félags íslenskra hjúkrunarfræðinga og var stjórnarkona í Samtökum Evrópskra hjúkrunarstjórnenda 2003-2011. Anna var kjörin í stjórn Rauða krossins á Íslandi árið 2005 og var formaður stjórnar 2008-2014. Hún er einn af stofnendum Landsamtakanna Spítalinn okkar og hefur verið formaður stjórnar þeirra frá stofnun árið 2014. Hún er formaður stjórnar Reykjalundar endurhæfing efh. Anna er stjórnarkona í umdæmisráði Rótarý á Íslandi og var umdæmisstjóri árið 2019-2020.
Anna er heiðursfélagi í Félagi íslenskra hjúkrunarfræðinga. Hún hlaut Riddarakross hinnar íslensku fálkaorðu fyrir störf í þágu heilbrigðis- og mannúðarmála 2016. Þá hlaut Anna þakkarviðurkenningu Félags kvenna í atvinnulífinu árið 2020 fyrir eftirtektarvert ævistarf stjórnenda í atvinnulífinu. Árið 2021 var Anna sæmd heiðursdoktorsnafnbót við Hjúkrunarfræðideild Háskóla Íslands.

Peter Griffiths

Prófessor í heilbrigðisvísindum við University of Southampton, UK

Peter Griffiths er prófessor í heilbrigðisvísindum við University of Southampton og leiðandi rannsakandi hjá National Institute for Health Research á Englandi. Hann leiðir Health Workforce and Systems research theme við NIHR Applied Research Collaboration í Wessex og er meðlimur í heilbrigðisvísindaakademíu University of Pennsylvania í Bandaríkjunum. Rannsóknir hans og kennsla snýr að mönnun og öryggi. Hann er sjálfur hjúkrunarfræðingur og hefur unnið náið við stefnumótun í Bretlandi og víðar um heim. Meðal þess sem hann hefur unnið að er gæðahandbók National Institute for Health and Care Excellence og mönnunarviðmið NHS í Bretlandi. Rannsóknir hans í dag snúa meðal annars að mönnunarviðmiðum út frá hagfræðilegu sjónarhorni og hvernig nálgast eigi vandamál tengd mönnun. Peter er einnig aðalritstjóri International Journal of Nursing Studies, en það er vísindatímarit sem er leiðandi á sviði hjúkrunarfræði á heimsvísu.

Peter Griffiths is professor of Health Services Research at the University of Southampton and a Senior Investigator for England’s National Institute for Health Research (NIHR). He leads the Health Workforce and Systems research theme for the NIHR Applied Research Collaboration in Wessex and is a fellow of the Centre for Health Outcomes Policy Research at the University of Pennsylvania (USA). His research and teaching focusses on safe staffing. A nurse by background, he has worked closely with UK and international health policy makers and contributed to the development of National Institute for Health and Care Excellence’s guidance and NHS Improvement resources on safe nurse staffing. His current research projects are exploring the economics of nurse staffing and approaches to determining staffing requirements. Peter is also Executive Editor of the International Journal of Nursing Studies, the world’s leading research journal in the field of nursing.

Dr. Sigurbjörg Sigurgeirsdóttir

Prófessor í opinberri stjórnsýslu og stefnumótun í Háskóla Ísland

Dr. Sigurbjörg Sigurgeirsdóttir er prófessor í opinberri stjórnsýslu og stefnumótun við stjórnmálafræðideild Háskóla Íslands. Hún lauk meistaragráðu í stjórnsýslufræðum árið 1999 við London School of Economics and Political Science og síðan doktorsgráðu við sama skóla árið 2005. Rannsóknir Sigurbjargar hafa beinst að því hvernig hugmyndir verða að veruleika í opinberri stefnumótun á tilteknum tíma, hverjir taka þátt í þeirri stefnumótun og hvaða aðferðum þeir beita. Doktorsrannsókn Sigurbjargar  var um sameiningu sjúkrahúsa í Reykjavík og í London á tíunda áratugnum. Þá hefur hún m.a. rannsakað þróun hugmyndanna að baki notendastýrðri persónulegri aðstoð hér á landi og þróun heilsugæslulækninga á Íslandi. Rannsóknir Sigurbjargar á áhrifum ákæru á hendur heilbrigðisstarfsfólki birtust í tímaritinu Stjórnmál og Stjórnsýsla í desember 2020 undir yfirskriftinni Criminalisation of Human Error in Health Care og í Læknablaðinu í janúar 2021 undir yfirskriftinni Viðhorf hjúkrunarfræðinga og almenn viðhorf til ákæru vegna alvarlegra sjúklingaatvika í heilbrigðisþjónustu: Eru blikur á lofti? Meðhöfundar að síðari greininni voru Elísabet Benedikz, læknir og Anna María Þórðardóttir, hjúkrunarfræðingur.

Sigrún Huld Þorgrímsdóttir MSc

Sérfræðingur í öldrunarhjúkrun og bókahöfundur

Sigrún Huld er sérfræðingur í öldrunarhjúkrun með áherslu á geðræn viðfangsefni aldraðra og hjúkrun fólks með heilabilun en hún lauk einnig diplómanámi í geðhjúkrun. Sigrún Huld lauk stúdentsprófi frá Menntaskólanum við Tjörnina 1974 og lauk hjúkrunarprófi frá Hjúkrunarskóla Íslands árið 1984. Hún starfaði framan af við Borgarspítala á blóð- og smitsjúkdómadeild en einnig í Kaupmannahöfn við lyflæknis- og öldrunarhjúkrun. Frá aldamótum hefur hún helgað öldrunarhjúkrun starfskrafta sína og unnið sem hjúkrunarfræðingur og deildarstjóri á Grund, í Skógarbæ og Landakoti meðal annars. Rannsóknir Sigrúnar Huldar og ritstörf hafa fjallað um öldrunarmál. Má þar nefna Minningavinna með öldruðum Íslendingum – mat á hjálpartæki. Ritrýnd grein í samstarfi við Kristínu Björnsdóttur: Reminiscence work with older people: the development of a historical reminiscence tool. Older People Nursing, 2015. Einnig greinarnar Sjálfræði aldraðra Íslendinga og Sjálfræði aldraðra: Hindranir í umönnun sem birtust 2010-2011 í Tímariti hjúkrunarfræðinga. Árið 2009 gaf hún út bókina Þegar amma var ung. Mannlíf og atburðir á Íslandi 1925-1955 sem hún vann í framhaldi af meistarverkefni sínu. Árið 2019 gaf hún út bókina Ný menning í öldrunarþjónustu sem er umfjöllun um breytt viðhorf og aðferðir í öldrunarþjónustu Vesturlanda á undanförnum áratugum.

Sigurður Ýmir Sigurjónsson

Hjúkrunarfræðingur og ráðgjafi hjá Samtökunum 78

Sigurður Ýmir er hjúkrunarfræðingur og hefur starfað sem ráðgefandi hjúkrunarfræðingur hjá Samtökunum 78 síðan árið 2020. Tengt starfi sínu þar sá hann verulega þörf á skoðun á stöðu hinsegin einstaklinga innan heilbrigðiskerfisins. Innan heilbrigðiskerfisins eru ýmsar hindranir sem hinsegin einstaklingar þurfa að yfirstíga til að fá þjónustu sem fullnægir þeirra þörfum. Þessi hópur er í viðkvæmri stöðu vegna aukinnar tíðni af ýmsum sjúkdómum sem getur herjað á þau. Eftir rannsóknarvinnu og skoðun varð til fyrirlestur sem ber nafnið ,,Hinsegin heilbrigði”. Hinsegin heilbrigði hefur vakið áhuga hjá ýmsum aðilum sem sinna hinsegin einstaklinum og efnið verið sett í námsskrá í hjúkrunarfræði á Háskólanum á Akureyri, Læknisfræði í Háskóla Íslands og í símenntun sjúkraliða. Læknar í heimilislækningum hafa sömuleiðis fengið fyrirlesturinn. Sigurður býður nú hjúkrunarfræðingum á Hjúkrun 2023 upp á hinsegin fræðslu og fyrirlestur um hinsegin heilbrigði.

Hugtakið hinsegin heilbrigði verður skoðað og hvernig hjúkrunarfræðingar geta sinnt hinsegin einstaklingum af virðingu og fagmennsku. Hinsegin einstaklingar eru í öllum hópum sem leita í heilbrigðisþjónustu og því þurfa hjúkrunarfræðingar að vera með rétt tæki og tól í höndunum til að sinna þessum hópi.